Poslovne vijesti - Srbija

На продажба 70 станови во Битола за млади брачни двојки

Министерството за транспорт и врски денес ќе објави оглас за продажба на 70 станови во зграда на улицата Кочо Рацин во Битола.

Становите наменети за млади брачни двојки и самохрани родители се со површина од 31 до 45 квадратни метри, а цената на квадратен метар без ДДВ е 554 евра. Во огласот ќе има објава и за три стана во општина Аеродром во Скопје, со просечна цена од 770 евра без ДДВ, кои не биле продадени на претходните три огласи.

Според министерот за транспорт и врски Миле Јанакиески, распределбата по електронски пат ќе се врши така, што две третини ќе можат да купат брачни двојки до 38 години и кои се во брак најмногу 8 години, а ќе се зема предвид и бројот на деца. Другата третина се наменети за самохрани родители во зависност од бројот на децата и перидот во кој се самохрани.

Барањата ќе се поднесуваат до 28 април. Јанакиески најави дека наскоро ќе има објави за продажба на вакви станови и во Штип и Битола. Во тек на проектирање се и објекти со 42 стана во Скопје и 58 стана во Битола, исто така наменети за млади брачни двојки и самохрани родители.

Становите што ќе бидат огласени денес се дел од владината Програма за изградба и одржување на станбениот простор во сопственост на државата што ја реализира АД за стопанисување со станбен и деловен простор. Со проектот за домување на социјално-ранливите групи е предвидена изградба на 35 објекти во 26 града во државата со 1.753 станови. Во периодот од 2007 до 2011 година се изградени девет објекти со 430 станови.